di Franco Gitto

CUNSIGGHI MITAFORICI

‘Ntisi na vuci ca ittava schigghi,
era, un rivinnituri di Cummogghi
d’appressu avia, a Muggheri e quattru figghi
senza dimura… e carichi di ‘mbrogghi.
‘Cci dissi: amicu, ‘nnaviti Gratigghi ?
Putemu fari barattu cu l’Agghi…)
m’arrispunniu cu a testa intr’e negghi:
non haiu Gratigghi, ma sulu Cummogghi.
Haiu a Muggheri, e sti quattru figghi…
e preju a morti s’idda m’arricogghi.

Dissi iu: amicu, ti rialu st’Agghi…
mettili tra la terra e li cummogghi,
quannu t’adduni ca mettunu i gigghi
pigghiati na Zappudda e li cattugghi…
e quannu beddi sicchi hannu li fogghi
vai, cu ‘tto Muggheri e li to figghi
li tiri ad unu ad unu e l’arricogghi.

Torna a to casa, e segui i me cunsigghi !
E poi essirni certu ca non sbagghi…
anzi; da sulu tinni miravigghi…
picchì: si ami la terra e la travagghi
hai dignitati… e fami nonni pigni.

di Franco Gitto

A Ferraustu, è vera festa ranni…
ma, st’annu, cu sta crisi
pinsannu a certi usanzi missinisi
arridu sulu, comu un Barbagianni.
P’u chinnici d’Austu, tutti l’anni
da ” Alì Termi a ” Ortu Liuzzu,
pi la Pruvincia, a coru, a tutti i banni
a pranzu è di riguri lu Jadduzzu;

quannu senti parlari i Ferraustu
parli i Muluni e Pullu o girarrustu.

E’ cosa arragiunata e alquantu giusta…
nonostanti sta crisi chi ci ammalia,
ma lu Jadduzzu non è Arausta…
e, non pi chiddu falliu l’Italia.

Missina, è sempri funti di mudestia,
è, na figghia addivata a vasciu custu…
ma, si vuliti mandarila in bestia,
nigatici u Jadduzzu a Ferraustu……)

Tutti i Varetti, lu chinnici sira
si Jungiunu atturniati di la fudda,
e, quannu a prucissioni s’arritira;
un pezzu i pani duru e na Cipudda…
e suddisfattu, u veru missinisi;
manna affanculu, Munti, Statu e crisi.