di Franco Gitto

A CUSCENZA VENI PRIMA DI LI DINARI

Ma, picchì, tutti i santi voti
ca, li cosi un vannu giusti
a curpa è sulu di l’Amministraturi ?
E li Eletturi … unni sunnu li Eletturi ?
Ca, un vijunu l’ura i pigghiarisilla cu cocchidunu?
Mi veni i pinsari ca, ognunu vota avoj,
pi putirisi sfugari l’innumani…)
E chistu, non è un bellu pinseru,
tantumenu, un sistema pi campari…
picchì: a virgogna,
non è mai di cu unn’è avvezzu a amministrari…
a virgogna,
è sulu e sempri i cu un sapi vutari
e finisci ogni vota pi sbagghiari.
Parissi fattu apposta
pi poi, putirisi dumani lamintari,
picchì vulennu;
dari a stu munnu la giusta risposta
sarìa accussì liggiu e elementari,
ca, siddu un semu veru fora i sennu,
e un si vutassi sulu pi dinari………
quannu si vota p’un veru Guvernu,
pigghiannu la Matita tra li mani
un s’avirria a pinsari;
cu quattru sordi, quantu poi campari,
ma, d’intra u cori d’ogni ginituri
vigiri avirria lu pinseri
dill’avviniri di li so criaturi.

Li figghi, non si crisciunu a furia di dinari…
si crisciunu, i cuscenza e veru amuri,
e assemi o pani… ci hai a sapiri dari
zzò chi è cuscenza, vantu… o disonuri.