di Giovanni Giardina
A MATTANZA! In ricordo dell’interpretazione di Angelino Merlino.
Quannu luntanu li vidi assumari
e n’ta l’aria li vidi satari
si studia di falli muriri
si cerca di falli m’brugghiari
n’ta trappula falli trasiri
n’tra iddi falli ammazzari
E’ la mattanza!
Cca accumensa la vera festa
quannu u parancu si metti n’forza
ora lu mari diventa timpesta
quannu virannu n’zumu li porta
Ora ca sunnu mienzi di fora
tinitivi pronti pigghiati li janci
forza ca veni, tiratici ora
morti a iddi e fissa a ccu chianci
Varda chiddu cumu e’ putenti
ca di tutti mi pari un giganti
puntalu ora ca veni i punenti
‘un ci tirari..vasci a livanti.
Criu ca sunnu cchiu’ di ducentu
beni ‘nni vosi lu nostru Santu
ora cuntentu lu cori mi sientu
ora pi iddi ‘un c’e’ cchiu’ scampu.
Cca finisci sta tarantella *
chista e’ la pisca di la mattanza
cca finisci sta tarantella
cu li tunni n’ta l’urtima stanza.
Ora alla genti ci piaci vardari
quannu n’ta rizza li vidi zumpari
subitu dopu si senti cuntenta
quannu lu janciu ci scassa la panza.
Cca la genti si senti scialari
quannu n’tra iddi li vidi ammazzari
subitu dopu si senti gudiri
quannu n’tra iddi li vidi muriri.
N’ta ddu mari ca prima era jancu
ora inveci e’ na scuma di sangu
n’ta ddu mari ca prima era jancu
ora inveci e’ e’ na festa di sangu !