Nostalgia ! Testo e registrazione di Giovanni Giardina, ma sopratutto Auguri a Bartolino per il suo onomastico AUGURI e ww S. Bartolo.
clicca sul triangolo bianco per ascoltare
U sacciu c’addivintaiu ringuliusu
e cacchi vota puru murrittusu,
ma si m’arriddusciu ‘nta stu statu,
sarà pirchì rispulviru u passatu !
Quann’era nicu, Diu mi cunnannó,
l’unicu sustiegnu c’avía, Diu mu livó
poi,‘un sapiennu cumu rimediari,
mi desi in canciu u donu di cantari .
A musica fu cumu a droga mia,
u riestu pi mmi, ’un’esistía
a ott’anni, cuminciaiu a cantári,
a desci, m’imparaiu a sonári
Unn’è chi c’era ió, c’era armonía,
e tanta, tanta musica e allegria,
man manu chi criscía ió, criscía a passioni,
‘nto stissu tiempu a vusci e a vocazioni.
Quantu emozioni chi pruváiu !.
Quantu soddisfazioni chi mi pigghiaiu !.
Iu a cantari puru a Caltagironi ,
e fu pu festival della canzone,
organizzatu tuttu da Regioni .
Cumu finù ? Aggiraiu cu titulu i campioni !.
E ddu complessu cu l’amisci mia !
L’anni cchiù belli i tutta a vita mia !
Ma t’annu si sonáva veramenti,
ancòra ‘un avíanu nisciùtu sti strumenti.
‘N’finu a quannu campáva Vartuluzzu
ancóra ma fidáva e scinnía o puzzu
appena sintía sonári u mandolinu
paría un vistitu ca mi cadía a pinninu.
Bastava co sintía sulu ‘n’tunári
ca subitu mi fascía avanti pi cantári;
cu tutti ddi canzuni napulitani,
era capásci di fari nuttati sani.
Ora ‘un si senti cchiù un mandulinu
senza du mastru ,’un c’è cchiú fistinu,
pari ca fussi a luttu tuttu u puzzu,
i quannu si iù a ripusàri Vartuluzzu.
E ió, si prima avía sciatu di jttári
ora, ‘un mi nni ristò mancu pi caminàri,
sientu a passioni ancòra ca mi tenta,
ma a frevi m’anchiana subitu a quaranta .
Purtroppu di n’artista, chistu resta,
‘nfilativielu tutti dintra a testa;
Prima campa di musica e poeisa,
e alla fini: sulu di nuda e cruda nostalgía !