A Giuvanninu ! ( i mastru Nofriu )
di Giovanni Giardina 2010 
clicca sul triangolo bianco per ascoltare
‘Nta stati spinsieratu cu l’amisci
passiava versu u centru du paisi
u suli e a calúra avía arrancàtu
sutta na tenna i bar, m’avía assittàtu
Truvaiu l’amicu ca battuta pronta
iò cumannava bibita alla menta
scircàva rifriggeriu ‘e cannarini
ca panza all’aria cumu si l’avìa china.
Unn’è chi mi ieru l’uocchi…versu S. Pietru,
un carru cu na salma e u preti dietru,
na crusci purtata avanti sulamenti
d’arriedu o muortu, nuddu , mancu un parenti.
Quannu arrivò cca, d’avanti a mia
scattàiu m’pedi…… cu na malincunía!!
Mi fisci u signu da cruci e poi na preci
pi dd’anima ch’é morta e ora riposa.
Di solitu ‘nta stu paisi, si parla tantu
i chistu ‘un si sintù poi diri nenti.
Cu era? Quant’anni avìa stu svinturàtu ?
Pirchì mancu un parenti , n’amicu i latu ?
Vu ricurdati u cani di Pistuni?
Ca in vita fu di fedeli cumpagnia,
quannu murù u patruni, ‘un fu pi l’ossa,
ca u cani si iù accasò supa a so fossa.
Mentri pinsava ‘nto bar di “ La precchia “
na vusci vascia mi parlò ‘nta ricchia
Sapiti cu murù? È Giuvanninu. “U figghiu i mastru Nofriu”!
Campáva n’trasannatu a cuntu propriu.
‘Nto ‘nviernu nun durmía mai ‘nto sciuttu
‘nta stati pa calùra era distruttu
pi lavarisi l’acqua ‘nt’on bidùni
pi cuscinàri, na fiamma cu carvùni !
Tifosu sficatatu finu all’ossu
di l’Inter na sciarpa, ‘nte so passi,
parlava sempri mali i stu paisi,
pirchì di guai sua ‘un’ebbi ‘ntisa.
Chi ti canciava si ora vinianu ‘n’tanti?
Ormai, ‘un vidi cchiù, nun senti nenti !
Si eri riccu e ccá lassàvi sordi,
allura si !!! musica, ghirlandi e tanta genti.
Vatinni Giuvanninu, e v’arriposa,
tantu ‘un lassi nenti, ne figghi e mancu sposa ;
I chiddi chi fannu accussì, cca ci nn’è tanti,
ma a fini:… si vannu a fari i cunti cu li Santi.