di Giovanni Giardina

L’amicu na vota  era na cosa seria

pirchí  tu truvavi  puru ‘nta miseria.

Si vua sapíri  oggi chi  nni  pienzu,

prima mi fazzu a Crusci e poi accuminzu

 

Oggi ‘un ci  nn’é cchiú amici veri ,

su tutti  tradituri , ‘un  sú  sinceri ,

u miegghiu  chi ha  e  c’ha sempri  stimatu,

a  prima  scusa  va  unni  l’avvocatu

 

 Na vota, si pi casu  eri  malatu

 l’amicu  tu  truvavi  sempri  i  atu

 quannu  aví  bisuognu  era  presenti

 e in canciu, ‘un ti scircáva mai nenti,

                                    

Oggi si  l’amicu  u vidi avviscinari,

e’ pirchi’ senti sciavuru  i manciari

giría, furría, ‘un  sapi  c’avi a  fari

pi  ti  putíri  a  fini  poi  scruccári.

 

Ma  na vota  si campava di valori !

unu  s’ammazzava  pi l’onori!

Prifiría  moriri  poviru  e  onestu

ca  campári  tradituri  e disonestu

                                                   

Io’, quannu  ancora  travagghiava

nun  c’era  unu  ca ’un mi scircáva.

tutti  mi scircavanu  cu l’amu

ora ‘un sannu cchiu’ cumu mi chiamu.                         

                                     

Chi brutti tiempi chi staiu  viviennu!

Prima pi l’amicizia , poi  pu  Governu,

e ‘un  ci fasciti  casu  si sugnu   gia’depressu,

pirchí  ancora  u  miegghiu, veni  appriessu !